【林蕾．留言集 x 久天長地舞台劇】02. 當奴 美極人生

當奴說，他像美極。不是什麼珍貴的極品頭抽，也不是什麼日本名牌醬油，是那瓶在超市廿蚊有找的美極。言下之意，少少鹹便有多多趣，幾滴可以提鮮，但多了你會想死。

改編自電台同事Wasabi小說的舞台劇《久天長地》穿越時空蕩氣迴腸，男女主角游學修和楊淇哭得死去活來，當奴這幾滴美極，是當中抒緩情緒的的搞笑擔當。

「我唔係負責感人，我係負責『樣衰』。」他笑道。

明明活在鎂光燈下，但又很少被燈光認真地照耀過。悲哀嗎？言重了。

當奴知足、踏實、謙厚。他樣子卡通，也具備排山倒海的幽默感，因此從不放負。他一直帶給人歡樂，含蓄地用生命滋潤生命。別以為這一切是他行走江湖的生存伎倆，他只不過是真正的心地善良。

自知是一個小人物，也甘心去做一個小角色。凡事甘心，自然快樂。

認命不等如認輸，能自嘲為美極，人生必定極美⋯⋯一定係，除非唔係。

康仔 康仔

如果真的有一次時光倒流的機會，當奴希望回到七歲那年。

「或者可以見到媽媽最後一面。」

不是生死，但肯定是別離。自懂性開始，當奴已知道爸爸與媽媽分開了。他與爸爸住黃埔新邨，媽媽每星期都會去接他，帶他買玩具、煮飯給他吃，直至他七歲。單親家庭的故事世上多不勝數，但當奴這個有點淒涼。

「有晚大概凌晨時分，我聽見媽媽在樓下嗌：『康仔、康仔』，我住低層，聽得好清楚，肯定自己唔係發夢。但那刻好眼瞓，無落去。自此之後媽媽就再無出現過。現在諗番，真係好後悔嗰晚無落樓見媽媽。我估，佢應該返咗韓國。」

當奴爸爸早年經營韓國餐廳，認識了當待應的媽媽。只可惜一頭家只得幾年壽命。

「我小學已經好懂性，唔會問媽媽去咗邊，因為知道爸爸一定會唔開心。」

與媽媽已經失聯了40年，她是生是死也不得而知了，即使今天兩人在街上相遇，也不會認得對方。

「其實印象已經好模糊，只記得佢短頭髮，好瘦、好靚，有啲似韓馬利。」

一早習慣了生命中沒有媽媽這個角色，因此沒有特別介懷。這背景與劇中男主角甘博年很相似，故事雷同純屬巧合？

「已經無乜感覺，唔會覺得無媽媽係一件好遺憾嘅事，反而見到身邊有啲有媽媽嘅人，仲同媽媽鬧交，我心裡就會講：『頂你啦』！」

當奴很接受自己的一切。爸爸為口奔馳，他從小自己照顧自己，一個人返學，一個人食飯盒。幸而他樂觀，從不怨天尤人。

「可能係天生，由細到大好少唔開心，亦好少呻，呻乜鬼？呻又唔會解決到件事。命運係咁就要接受，呢種態度唔係悲觀，反而係積極地面對人生。」

儲里數

當奴樂天知命，命運也沒有刁難他，這樣的性格跟之後的人生道路不謀而合。

「入商台時俞琤已經教，你幾唔開心都好，唔需要話俾人知，關我鬼事？個節目交俾你，你有責任帶歡樂俾聽衆。」

他中五畢業後進了商台做辦公室助理，他記得，第一天上班遇見軟硬，嚇到瀨尿，但又夠膽死跑去要求合照。葛民輝要把手錶拿到中環修理，林海峰要買波鞋，當奴都樂意效勞。

「出面個個當佢哋係偶像，佢哋當我係朋友，仲想點呀？」簡直是與有榮焉。

起點低因此進步快，這個帶著一半韓國血統的小running man很快升做文員，之後是錄音室控制員，再來是製作助理，跟著正式開咪做DJ，一步步站穩陣腳。 2002年與少爺占組成艾粒 （I Love You Boyz）出道，很認真地做看似騎呢的事，大受歡迎。每個年代的觀眾，大概都需要一些瘋狂的娛樂。

「你哋笑我真係無所謂，我好樂意配合大家。」他十分認真。

從來沒有什麼身段可言，因此沒有什麼放不下。能引人發笑，也算是一種成就。

「有啲人越想紅越唔紅，我無刻意追求，反而覺得自己有今日嘅成績，已經偷笑。我從來唔會羨慕其他人，唔通見到其他artist有好多廣告拍，我又好恨咩？有啲嘢唔輪到你就係唔輪到你。」

當奴很喜歡用「偷笑」去形容自己。他不是故作謙卑，説穿了，是自知學歷不高，又不是靚仔，能夠在娛樂圈中佔一席位，已足夠自我感覺良好。向來有工作才有安全感，因此他也很有危機感。

「艾粒出年要慶祝二十週年，時間過得咁快真係好恐怖。喺電台做，無可能靠呢套武功做一世，一定會去其他媒體工作。到咗我呢個年紀，應該係着件簡單白T恤行出嚟都好自信、好有型，但問題係，自己有幾多料先？我依家每做一單工作都好似儲里數咁，希望自己底子厚啲。我只相信做好目前，自然會繼續有人搵我做嘢，我仲想進步。」

認真對待角色

當奴正經起來都幾勵志，說話完全可以做個志氣bite。他認命但沒有認輸，一直認真工作，而工作機會的確是未停過。除電台外常做電視主持，也開過個人騷，2019年艾粒更踏過紅館，很多時他甚至是度橋做創作那個。

「之前邵氏兄弟節目《鬼上你架車》，成條橋其實係我度出來。」

也許觀眾看慣了他做下把位，忽略了他的其他才華。事實上，他現時在電台正式的職位是商業二台總監，專責創作，三十年經驗沒有白過，這張成績表十分見得人。

最近參演舞台劇《久天長地》演出，算是第一次演正劇，終於見識到天外有天，原來自己也真的有進步空間。

「白只、游學修、楊淇佢哋圍讀劇本時個個揸住支筆係咁做筆記，唯獨我冇，我心諗，係咪都要揸返支筆寫啲嘢呢？」

對手強勁，當奴知道今次要更加認真對待角色。

「以前做騷，其實都係做自己，搞下笑、字正腔圓講晒對白就得。雖然我今次都係做一個『美極』位置，但導演話一定要知道成個劇發生乜事，講對白要了解前文後理，要有深度、要有畫面。」

不是學院派出身，又沒有受過正規的演技訓練，當奴是有點怯。

「之前無咁驚，但越排越驚，佢哋排五場喊足五場，啲戲勁到呢！梗係緊張啦⋯⋯佢哋呢班演藝畢業嘅，（笑著說）最鍾意『歧視』我呢啲無讀過演藝嘅，我成日見到佢哋竊竊私語，呢單嘢我遲早實走去平機會度告佢哋⋯⋯」

保持好奇

當奴不正經的時候，真是無聊到一個點。當然沒有人歧視他，他只是骨子裡有種神經刀的幽默感，有意無意地滲透在日常生活中。也許，保持幽默，才能保持年青。論年紀， 47歲的Donald絕對是位uncle，但今次飾演游學修由中學到大學的同齡同學，又沒有違和感。游學修可是比當奴年輕十六年。

「乜佢得31歲咋，死仔吖⋯⋯保持青春嘅方法，係乜都想學，總之有新嘢玩就開心。但都真係老咗，已經開始有老花，頭髮又好『行』。之前睇奧運滑板比賽，見到有件夾乸衣好靚，好想買，但幾十歲人仲點著夾乸衣？最後只係買咗件日本隊外套。」

他今天就是穿着這件日本隊外套來做訪問，尚算濃密的頭髮向前梳，的確沒有麻甩味。青春可以是年齡，更大程度上是心境。凡事保持好奇、保持熱血，自然不顯老。當奴玩過攀石、行山、跑步，又學會了剪片。他開車會聽林欣彤，也很喜歡Ian陳卓賢。

「其餘嗰啲（Mirror成員）都鍾意，你一定要幫我寫埋呀！」他吩咐。

他是好好先生，永遠會顧及身邊人感受。

「最想學嘅，」他又回復正經，「其實都係做戲。早前訪問梁朝偉，佢話每次回望，都覺得下一次可以做得更好。佢呢啲叫做微調，我就係完全未到位。回望返自己有份做嘅戲，真係好屎。」

劍康

當奴全名唐劍康，有點像武俠小說裡的名字。莫非， 唐爸爸想兒子武功高強，又或者像劍客般浪蕩瀟灑？

「唔關事， 劍字只係

跟族譜，我呢輩有親戚叫劍雄、劍華、劍威，有個堂家姐叫劍蘭。爸爸只係揀咗個康字，其實好平凡。我希望大家都

健健康康，同你想鬥嘅人鬥命長。」

這年頭，留得青山在，命仔真係好緊要。當奴的祝福，大家心領神會。

【完】